افلام عربي - افلام اجنبي - العاب - اغاني -نكت- اخبار الكمبيوتر والانترنت
أهلا و سهلا بك يا زائرنا الكريم

هذه الرسالة تفيد بانك غير مسجل لدينا


,أذا كنت تملك عضوية سابقة فأرجوا منك الدخول بعضويتك عن طريق الضغط على زر الدخول

أذا كنت زائر جديد فأرجوا منك التسجيل بعضوية
جديدة عن طريق الضغط على زر التسجيل لكي تتمكن من المشاركة مشاهدة مواضيع
المنتدى اماى واى احلى منتدى


افلام عربي - افلام اجنبي - العاب - اغاني -نكت- اخبار الكمبيوتر والانترنت

بسم الله الرحمن الرحيم وبه نستعين
 
افلام - العابالرئيسيةس .و .جالتسجيلدخول
 


 
 





شاطر | 
 

 خطبة تفوت ولا حد يموت!

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
sh3n0na
نائب المدير
avatar

عدد المساهمات : 621
تاريخ التسجيل : 26/07/2009
العمر : 28

مُساهمةموضوع: خطبة تفوت ولا حد يموت!   الثلاثاء سبتمبر 01, 2009 4:54 am


يتطلع رامز من شرفة المنزل المطلة مباشرة على مسجد حي حلوان حيث يقف إمام المسجد يلقي خطبة الجمعة..
الإمام: كلها
أيام ونستقبل رمضان.. شهر القرآن، فهل ستستقبله برائحتك "الكريهة"؟!! هل
ستقابله بجسد تفوح منه رائحة المعاصي؟ هل ستستقبله وأنت غارق في خطاياك؟!!
إييييييييييييه... خلااااااص اتعودت على الذنوب زي ما عُمال المجاري
اتعودوا على ريحتها، ما بقتش قادر تشم ريحتك المعفنة (يقولها بلهجته
الريفية بكسر الفاء والنون).
يلوي رامز شفتيه في امتعاض
ناظراً إلى الساعة المعلّقة أعلى الجدار المقابل له في انتظار حلول
الدقائق الخمس الأخيرة التي تسبق الإقامة؛ كي ينضم لجموع المصلين فيتفادى
ذنب التخلف عن صلاة الجمعة، وفي الوقت ذاته ينقذ أذنه التي كانت ستعاني
كثيراً من إمام المسجد.

تقدر تنكر؟
إن
يوم الجمعة عندنا يوم مهم مش بس علشان هو يوم الإجازة، لكن علشان كمان
صلاة الجمعة أهم حاجة بنعملها في اليوم ده، واللي بيكون لها استعداد خاص
عن بقية الصلوات.. بس إن جيت للحق إحنا شايفين إن مفيش اهتمام كفاية
خصوصاً بخطبة الجمعة لا من الإمام ولا من الناس، وحتى الخطبة نفسها بقى
ناقصها شيء.. ما تيجي نناقش الموضوع مع بعض بصراحة أكتر..



تعالَ نتكلم بصراحة
مفيش
حد يختلف معانا لو قلنا إن إمام المسجد هو شاحن بطارية الإيمان للمسلمين،
اللي بيروحوا له لما بطاريتهم تفضى كل يوم جمعة، مفترض فيه إنه يشحنها
بدين الدنيا ودنيا الدين، مش مفترض أنه يحوّل الخطبة لنشرة أخبار، ولا
كمان مفترض إنه يقصرها على أخبار ومواقف السلف الصالح من 1400 سنة، لكنه
ميزان حساس لازم يكون ماسكه عشان يضمن قلب وعقل الناس، ميزان بين الدين
والدنيا، ربط بين ما كان وما هو قائم، كلمة طيبة نخرج بها، يبكينا مرة،
ويفيدنا مرة، ويدينا أمل 3 مرات.
علمه كمان شيء أساسي، فمش من
المعقول أن يتم شحن بطارية بشاحن مزيف فلن تصل لها الكهرباء، وبالتالي
فأئمة الزوايا، والشيخ إبراهيم جارنا المتدين، وعم أحمد صاحب محل العطارة
دول ناس كبّارة لكن للمنبر ما يتصدروش، ممكن في قاعدة عرب نسمع لهم، ممكن
ناخد نصيحة منهم، لكن يلبس جبة وقفطان ويقول ده حلال وده حرام.. ما اعتقدش
إنه ينفع.

أنت نمت ولا إيه؟؟ لا إحنا هنا مش في الجامع.. صحصح وقول لي رأيك؟
مش
شايف إن الخطبة فيها مشكلة؟ مش لأنها بقت قصيرة جداً في كتير من المساجد
ولا طويلة جداً في مساجد تانية، ولا لأن الإمام أزهري لابس عمامة ولا شاب
كاجوال لابس قميص وبنطلون وحاطط جيل في شعره.. لأ.. لكن لأنها بعدت كتير
أوي عن مشاكل حياتنا خاصة الشباب مننا، ولسه بتتكلم في المناسبات وتستعيد
الأمجاد والذكريات بدون نظرة ولو من بعيد على الحاضر اللي بقى أصعب بكتير،
ومحتاج الاجتهاد من ناس مهمين في حياة المصريين زي علماء الدين مش في
الفتاوى على 0900 والخط الساخن أبو جنيه نص للدقيقة لكل ما تخطر في باله
فتوى أو عايز رخصة، لا في قضايا شباب بلادنا المستعصية واللي مش عارفين
نلاقي لها حل من سنين طويلة؛ زي البطالة اللي بتزيد، والزواج اللي ما بقاش
عرفي بس وفيه منه متعة وسياحي ومؤقت وأسماء تانية لازقة فيه ومالهاش دعوة
بالجواز أصلاً، والمخدرات -الحشيش خصوصا بعد انتشاره الرهيب- اللي خلّى
شاعر عامي مهم جداً يقول عنه إنه بقى المشروب الرسمي للمصريين! لحاجات
تانية كتير مخجلة بنتكلم بعض فيها ونستغرب بدون ما يكون عندنا الجرأة ولا
الشجاعة نناقشها ونستغل تجمع الشباب في الجوامع يوم مهم زي يوم الجمعة..




يا ترى هتزعل مني لو قلت لك إن أنت كمان جزء من المشكلة؟
آه
ما تبصليش.. اللي بينزل من بيته بعين مفتوحة والتانية مقفولة، مش هيكون
عنده استعداد يسمع خطبة يخرج منها إيمانه منتعش.. اللي بيروح المسجد تقضية
واجب هو كمان جزء من المشكلة.. اللي بيستمتع أوي بهواء المراوح والركن
اللي جنب الباب عشان ينام نوم عميق يصحى منه على تأمين المصلين خلف الإمام
ده برضه جزء من المشكلة.
ربنا ما خلقش اللسان عشان ندفّيه جوا
"بقّنا"، ربنا خلق لنا لسان نعبر بيه، نصرخ من اللي مضايقنا، نعترض، قبل
ما تاخد قرار إنك تقاطع الجامع، اوصل لحد المسجد هتلاقي صندوق شكاوى حُط
فيه شكوتك أو وقّفه دقيقة قول له عايز أتكلم مع حضرتك، عبّر للإمام عن
أزمتك، فهّمه إن أنت معترض على كلامه مش شخصه، فهّمه إن اللي مضايقك واحد
اتنين وإنك ما بتخرجش من الخطبة غير بيادوب سطرين، رسّيه الشباب عايز إيه،
يمكن فاكر المصلين ما بين عجائز وأطفال في كي جي تو، فكّره إن فيه شباب كل
جمعة بيبقى مستنّيه.
أكيد اللي بيقعد منّا ويسمع الخطبة وينام
أو يسرح ويفكر في حاجات تانية، وبيخرج وهو مش فاكر حاجة من اللي سمعها أو
بيقول للي جنبه الكلام ده بنسمعه كل سنة في نفس المعاد.. أكيد يتمنى إنه
يسمع خطبة في أي حتة في مصر بتتكلم عنه وبتساعده على حل مشاكله ويحس إن
التجمع ده مش مجرد عدد من الناس مترصصين جنب بعض وخلاص قَدّ ما هم جايين
ومستعدين علشان يسمعوا ويناقشوا مع الإمام كل اللي سمعوه ويخرجوا وعندهم
الحل لمشكلة من مشاكلهم المستعصية..

ودلوقتي



يا ترى أنت بتستفيد من خطبة الجمعة ولا بتناااام؟
ولو كنت بتنام شايف المشكلة فين بالظبط.. في الإمام ولا في الخطبة ولا فيك أنت؟!!

ولو كنت مابتستفيدش يا ترى بتصر على الحضور ولا بتطنّش؟

ولو كنت بتطنّش.. فالمهم عشان خاطري بلاش.. يا ريت ما تطنّشناش..
وما تنساش تقول رأيك؟!!
الرجوع الى أعلى الصفحة اذهب الى الأسفل
 
خطبة تفوت ولا حد يموت!
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
افلام عربي - افلام اجنبي - العاب - اغاني -نكت- اخبار الكمبيوتر والانترنت :: اسلاميات :: الخيمة الرمضانية-
انتقل الى: